ករណីមន្ត្រីនគរបាលចរាចរណ៍ ខេត្តកណ្ដាល រត់ចោលគោលដៅ បន្ទាប់ពីបង្ករបញ្ហាជាមួយប្រជាពលរដ្ឋធ្វេីដំណេីរតាមដងផ្លូវ ពេលនេះ ស្នងការនគរបាលខេត្តកណ្តាល បានបញ្ជាកម្លាំងជំនាញស្រាវជ្រាវ ស៊ើបអង្កេត

ខេត្តកណ្តាល៖ នាថ្ងៃទី០២ ខែមេសា ឆ្នាំ២០២៥ ត្រង់ចំណុចផ្លូវជាតិលេខ ៣ ចន្លោះគីឡូម៉ែត្រលេខ ២៨-២៩ ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល មានករណីមន្ត្រីនគរបាលចរាចរណ៍ផ្លូវគោក បានស្ទុះចេញមកឃាត់រថយន្ត pick up ហ្វត មួយគ្រឿងដែលកំពុងបេីកបរ ក៏បានបណ្តាលឲ្យម្ចាស់រថយន្ត ហ្វត ជាន់ហ្រ្វាំង ភ្លាមៗ ស្រាប់តែ ពេលនោះ មានរថយន្ដមួយគ្រឿងទៀត បេីកមកបុករថយន្តហ្វតពីក្រោយ បណ្តាលឲ្យក្លាយទៅជាគ្រោះថ្នាក់ចរាចរណ៍តែម្តង។

បន្ទាប់ឃើញហេតុការណ៍គ្រោះថ្នាក់ចរាចរណ៍ កើតឡើង ភ្លាមនោះ ស្រាប់តែមន្ត្រីនគរបាលចរាចរណ៍ទាំងនោះមិនបានចុះវាស់វែងដេីម្បីរកដំណោះស្រាយអោយប្រជាពលរដ្ឋទេ បែរជានាំគ្នាបេីករថយន្តគេចចេញពីគោលដៅអស់តែម្ដង។ នេះបើយោងតាមប្រភពដែលសារព័ត៌មានយើងទទួលបាន។

ករណីខាងលើនេះ អ្នកនាំពាក្យនៃស្នងការដ្ឋាននគរបាលខេត្តកណ្តាល បានបំភ្លឺឲ្យដឹងថា៖ លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាល ខេត្តកណ្តាល បានបញ្ជាកម្លាំងជំនាញចុះស្រាវជ្រាវ ស៊ើបអង្កេត អំពីតួនាទី ភារកិច្ច ទៅលើកម្លាំងនគរបាលចរាចរណ៍ពាក់ព័ន្ធក្នុងការអនុវត្តរឹតបន្តឹងច្បាប់ចរាចរណ៍ផ្លូវគោកនៅគោលដៅនេះ៕