ប្អូនតិរច្ឆាន វ៉ៃបងស្រីបង្កើត ស្ទើរក្លាយជាមនុស្សរុក្ខជាតិ ឥឡូវកំពុងរត់គេចខ្លួន

ខេត្តកំពង់ចាម៖ ផ្តើមចេញពីទំនាស់របងព្រំដី រហូតឈានដល់ការប្រើអំពើហិង្សា យ៉ាងឃោរឃៅ ពីសំណាក់ប្អូនប្រុសតិរច្ឆាន ម្នាក់ បានយកដំបងឬស្សី វាយក្បាលបងស្រីបង្កើតរបស់ខ្លួន យ៉ាងចាស់ដៃ រួចក៏រត់គេចខ្លួនបាត់ស្រមោល។

ហេតុការណ៍ដ៏ឃោរឃៅនេះបានកើតឡើងកាលពីថ្ងៃទី១៨ ខែមីនា ឆ្នាំ២០២៥ ត្រង់ចំណុចដីភូមិមួយកន្លែង ស្ថិតនៅឃុំកងតាណឹង ស្រុកកងមាស ខេត្តកំពង់ចាម បង្កដោយជនដៃដល់មានឈ្មោះ លន់ ធឿន ត្រូវជា ប្អូនប្រុសបង្កើត របស់ស្ត្រីរងគ្រោះ។

ស្ត្រីដែលជាជនរងគ្រោះបានលើកឡើងថា៖ មុនពេលកើតហេតុខ្លួនបានទៅសួរនាំ អំពីការធ្វើរបងថ្ម  ដែលបានរំលោភបំពានចូលមកក្នុងដីភូមិរបស់ខ្លួន ភ្លាមនោះស្រាប់តែប្អូនប្រុសបង្កើតចិត្តតិរច្ឆានរូបនោះ ពុំបានឆ្លើយតបអ្វីទាំងអស់ ស្រាប់តែទាញដំបងឬស្សីវាយមកវ៉ៃកណ្តាលក្បាលបងស្រីបង្កើតយ៉ាងដំណំ។

ក្រោយបង្កហេតុរួចមក ជនដៃដល់ ឈ្មោះ លន់ ធឿន រូបនេះ បានរត់គេចខ្លួនបាត់ស្រមោល សូម្បីតែដានជើងក៏រកមិនឃើញ។ ចំណែកស្រ្តីរងគ្រោះកំពុងតែប្រឈមនឹងជំងឺ ប្រព័ន្ធសសៃប្រសាទអាចក្លាយជាមនុស្សរុក្ខជាតិ ដោយសារតែជនដៃដល់ ឈ្មោះ ធឿន យកដំបងឬស្សីវាយយ៉ាងចាស់ដៃចំកណ្តាលក្បាល។

ស្រ្តីរងគ្រោះស្នើសុំទៅកាន់ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងលោកឧត្តមសេនីយ៍ទោ ហេង វុទ្ធី ស្នងការ នៃស្នងការដ្ឋាននគរបាលខេត្តកំពង់ចាម សូមមេត្តាជួយស្រាវជ្រាវចាប់ខ្លួនជនដៃដល់ ឈ្មោះ ធឿន យកមកផ្តន្ទាទោសតាមផ្លូវច្បាប់ផងទាន៕