ទីតាំងផលិតបារី គ្មានយីហោ មួយកន្លែង នៅរាជធានីភ្នំពេញ កំពុងធ្វើឲ្យប៉ះពាល់សុខភាព ប្រជាពលរដ្ឋយ៉ាងខ្លាំង...!

រាជធានីភ្នំពេញ៖ ទីតាំងឃ្លាំងគ្មានយីហោមួយកន្លែងស្ថិតនៅផ្លូវលំ ក្នុងសង្កាត់កំបូល ខណ្ឌកំបូល រាជធានីភ្នំពេញ កំពុងតែធ្វើសកម្មភាព យ៉ាងមមាញឹកក្នុងការផលិតបារី បានបង្កឱ្យមានផលប៉ះពាល់យ៉ាងខ្លាំងដ៏សុខមាលភាពប្រជាពលរដ្ឋ។

តាមប្រភពបាននៅថ្ងៃទី១៣ ខែមីនា ឆ្នាំ២០២៥ ទីតាំងនេះបានបើកដំណើរការជិត ៣ឆ្នាំហើយ មិនទាន់មានអាជ្ញាធរ និងមន្ត្រីជំនាញណាមួយចុះអនុវត្តនិងមើលថាទីតាំងនេះមានច្បាប់ទម្លាប់ត្រឹមត្រូវឬអត់ ម្យ៉ាងទៀតប្រជាពលរដ្ឋបានឆ្លងកាត់លើផ្លូវលំនេះទៅវិញទៅមកលើកឡើងថា «ទីតាំងនេះរោងចក្រផលិតបារីមិនស្គាល់ម៉ាក ហើយមានជះក្លិនមិនល្អ ប៉ះពាល់ទៅដល់សុខភាពកុមារតូចៗក៏ដូចជាប្រជាពលរដ្ឋរស់នៅទីនោះ និងអ្នកធ្វើដំណើរផងដែរ»។

ប្រជាពលរដ្ឋជាច្រើនរស់នៅតំបន់ខាងលើ សំណូមពរទៅដល់លោក ឃឹម ស៊ុនសូដា អភិបាលនៃគណៈអភិបាលខណ្ឌកំបូល និង អភិបាលនៃគណៈអភិបាលរាជធានីភ្នំពេញ ឯកឧត្តម ឃួង ស្រេង រួមទាំងមន្ត្រីជំនាញពាក់ព័ន្ធ សូមមេត្តាជួយចុះត្រួតពិនិត្យមើលទីតាំង ផលិតបារីខាងលើនេះផង។ ព្រោះទីតាំងនេះធ្វើឲ្យប៉ះពាល់សុខភាពកុមារក៏ដូចជាប្រជាពលរដ្ឋ ដែលរស់នៅទីនោះដោយខ្លាំងណាស់។

ប្រជាពលរដ្ឋជាច្រើនក៏សូមអំពាវនាវ សំណូមពរទៅកាន់គណៈកម្មាធិការវិទ្យាសាស្ត្រ បច្ចេកវិទ្យា និងនវានុវត្តន៏ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សូមជួយចាត់មន្ត្រីជំនាញចុះអធិការកិច្ច ត្រួតពិនិត្យទៅលើ ទីតាំងឃ្លាំងផលិតបារីគ្មានយីហោខាងលើនេះផង៕